محبوبة الصبح - ماجد الرسلاني

محبوبة الصبح نور الصبح لجلك رقص

شبيهك المنتظر ليلته ما باتها 

اللي تميّز قصصها عن جميع القصص

واحلى السنابات ياماجد سناباتها

من شعرها الليل يسج بلبلين وقفص

ليل الشتاء اللي قصر من دفء همساتها

لا سولفت كل من قال: اسكتوا، أص أص

السحر  في حكيها والعطر بسكاتها  

لو شهريار ألف ليله زاد والا نقص

وش شهرزاده معاك  ووش حكاياتها

يافرصة العمر ؛ دام العمر قالوا فرص

يا أجمل فصول الهوى وأجمل نهاياتها

لو تقسمين المحبة: إنتي نص، آنا نص

يمدي عرفتي شقاء الروح وعذاباتها

أنا أحسب إني خلصت ،أثرك ما منك مخلص

يا أغنيات الحياة،  ودافي اصواتها

يا قصةٍ ما تولّاها رقيب ومقص

من أبطالها لين حبكتها وصراعاتها

من يوصفك بالمهاة  من الجمال انتقص

ما تشبه  الا التافاتتك التفاتاتها 

عين اشقرٍ فيه ابن زايد محمد قنص

جول الحباري تضيع إن هد هقواتها

أعجز جميع النصوص الفاخرة ؛نص نص

أشعارها ، مع قصصها ، مع رواياتها

جمالك اللي عطى الدنيا دروس وحصص

و اوصافك ؛ أيقونه العشاق وأبياتها