شهداء ساحة الطيران - نصر البحار
ها يالشاعلين شموع شخباره
مكاني البي افتح وادفع ايجاره
رايح اوكفولي شويه ع البالات
واذا اتأخر الله يريد خطاره
احنه الننخسر والعافنه يفوته
واحدنه جبير سوالف سكوته
مو وحدي رحت يايمه ربعي وياي
علاوي وعمر صحباني بالموته
واكو واحد شهيد يغني للميتين
شحجيلج ييمه شكد حلو صوته
رايح والوداع يهز كلب امي
عريس ورحت بس حنتي دمي
واصعب شي انام بلا حظنها الزين
اموت من البرد لو هيه مو يمي
صرنه بلا ذنب ماضي وفقط صوره
على هذا الجزه يادنيا مشكوره
اوصيكم يعالم بأمي لتكطعون
لتخلوها بالدمعات مكسوره
واذا تبجي عليه هواي لا تحجون
من حركة كلبها تبجي معذوره
تعليقات
إرسال تعليق